Open dag på «Sjøsportsenteret»

Foto: Averøy UK Sjøsport

Laurdag 21. april kl 10.00-14.00 Averøy UK Sjøsport stiller med trivelige folk på kaia i anledning Kulturhelga Havglimt. Mellom kl 10 og 14 på lørdag 21. april viser Sjøsportsenteret fram utstyret og fasilitetene de disponerer, svarer så godt de kan på det du lurer på og hjelper deg gjerne ut på sjøen en tur hvis været tillater det.

Måleverkstad / Måleri og glaskunst

Laurdag 21. april kl. 12.00-14.00
Søndag 22. april kl. 12.00-14.00

Marit Rangøy Fladset er ein moldekunstnar med røter fra Rangøya, som sjølv kjem til å stille ut maleri og glasskunst.  Kurset er for alle aldersgrupper og krev ingen forkunnskapar: dette er berre gøy! Ho tek 120 kroner for kurset per deltakar som inkluderer alt nødvendig materiell.

Vi ber om at alle interesserte melder seg på til Åse Dyrhaug: aasedyrhaug@hotmail.com, 971 89 785

Rangøya frå padlarperspektiv

Fredag 20. april kl 18.00

Trond Eri er ein erfaren padlar og padleinstruktør. Han er padlesjef i kajakkompaniet, har halde kurs for Norges Padleforbund, vore leiar i teknisk komité hav i padleforbundet og har padla heile norskekysten på langs. Og ikkje minst har han i ei årrekke vore med på padlesamlingar på Rangøya, med deltakarar frå heile landet. Fredag 20. april kjem han til Kulturhelga for å snakke om Rangøya frå padleperspektiv.

Båtmotorar og «motortelt»

Båtmotorar v/Leif, Knut, og Einar Rangøy (Kulturhelga Havglimt 2016)

Utstilling alle dagar
Båtmotorane blir starta opp:
Fredag 20. april kl 19.15
Laurdag 21. april kl 17.30
Søndag 22. april kl 13.30

Knut, Leif og Einar Rangøy er tre brør som alle har ei litt spesiell interesse: gamle båtmotorar. Det er mykje mat i eit gammalt slips, blir det sagt, og kanskje også mykje kystkultur i ein gammal båtmotor. Desse bruksgjenstandane har sin estetikk, og ikkje minst sin spesielle lyd.

Nokre dagbokblad frå soknepresten

Foto: Inga Mölder

Laurdag 21. april kl 17.00

Magne Hoem kjem frå Ytre Hoem i Fræna, er teolog og sokneprest i Averøy. Han er bror av forfattar Edvard Hoem og har bakgrunn både som lokalpolitikar, fredsaktivist, aviskronikør — og ikkje minst som sjømannsprest.  På 1990-tallet var han engasjert som fast radiokåsør i Vigra lokal. Laurdag 21. april kjem han til Kulturhelga Havglimt for å dele nokre glimt under overskrifta «Nokre dagbokblad frå soknepresten».

Havørnene rundt Rangøya

Jeremy Hill. Foto: Øyvind Rangøy

Laurdag 21. april kl 14.00 på Løa
Utstilling i Brygga alle dagar

Jeremy Hill står tidleg opp. Med utdanning som marinbiolog har han livnært seg med fjernjobbing i IT-bransjen, men det verkelege livet for Jeremy er ørnene. Kor mange timar med vaking og kikring han har brukt på å vinne deira tillit og kome nær med si kameralinse, veit berre han sjølv. Laurdag 21. april klokka 14 fortel han om havørnene i Rangøy-området, og under heile kulturhelga er hans flotte ørnefotografi utstilt i Brygga, med høve også til å kjøpe med seg eitt av dei for den som kjem først til mølla.

Eit fyrtårn ytterst ute

Kirsti Mathilde Thorheim og Ona fyr

Laurdag 21. april kl 18.00

Ona fyr er eit symbol. Men Ona er også ein stad som finst, eit reelt bustad for atten fastbuande menneske. Denne staden på kanten av kartet har fire ferjeavgangar og ingen. matbutikk — men derimot to keramikarar på heiltid, strikkebutikken To runde pinnar, og no også eigen sjokoladeproduksjon. For forfattar Kirsti Mathilde Thorheim er dette ein fritidsbustad, ein stad å kome, men også ein gjenstand for lengt. Laurdag 21. april kjem ho til Kulturhelga for å fortelje om dette.

 

Kinomatiné: Rett vest

Søndag 22. april kl 14.00
(Engelsk teksting)

RETT VEST blir omtala som «En varm og morsom feelgoodfilm om alt det vakre som kan komme ut av sorgen.» Søndag 22. april blir det kinomatiné ved Kulturhelga Havglimt — dette er ein ny norsk film med direkte tilknytning til vår del av Noreg. Når det ber rett vest i denne filmen, er det til Ona dei skal. Men også Atlanterhavsvegen finst det sjansar for å få eit glimt av.

Billett 50 kroner.

Opne båtar — fiskeskøyta Torvald

Torvald og Knut Rangøy. Foto: Øyvind Rangøy

Laurdag 21. april kl 10.00-14.00

Rangøya har ei lang historie som heimstad for større og mindre fiskebåtar. Her var heimehamna for Rangøy Senior, registrert som M-120-AV. No har fiskeskøyta Torvald fått dette nummeret, og denne trebåten frå 1960 er bygg nummer 146 frå Bremsnes båtbyggeri. Namnet har skøyta fått etter båtbyggar Torvald Strand, og i år var ho med den stolte reiaren Knut Rangøy på lofotfiske. Og laurdag 21. april kan du sjølv ta dette stykket kystkultur i augesyn.

 

Verda rundt med Framstig

Laurdag 21. april kl 15:00

Treskøyta Framstig er 104 år gammal, med ei fargerik historie. For snart 40 år sidan la ho saman med brørne Svein og Kåre Flem ut på den lengste moglege reisa som kan kallast éi reise: ei jordomsegling.

Etter 290 døgn i sjøen, 107 hamner og 28400 nautiske mil tilbakelagt vende skuta og eventyrarane trygt tilbake til Noreg. Og skuta — ho flyt framleis.

Under Kulturhelga Havglimt kjem sjølvaste Svein Flem for å vise film frå denne ferda. Og du kjem sjølvsagt for å sjå: laurdag 21. april kl  15:00.