Har du lyst å skrive ut ein plakat med program?
Den kan du laste ned her. Del den gjerne med andre!
Verda rundt med Framstig
Laurdag 21. april kl 15:00
Treskøyta Framstig er 104 år gammal, med ei fargerik historie. For snart 40 år sidan la ho saman med brørne Svein og Kåre Flem ut på den lengste moglege reisa som kan kallast éi reise: ei jordomsegling.
Etter 290 døgn i sjøen, 107 hamner og 28400 nautiske mil tilbakelagt vende skuta og eventyrarane trygt tilbake til Noreg. Og skuta — ho flyt framleis.
Under Kulturhelga Havglimt kjem sjølvaste Svein Flem for å vise film frå denne ferda. Og du kjem sjølvsagt for å sjå: laurdag 21. april kl 15:00.
Internasjonalt bord
Søndag 22. april frå 15.30
Ein av dei store suksessane under Kulturhelga Havglimt i 2016 var det internasjonale bordet. Vi gjentek suksessen!
Du har sjølvsagt alt sett av heile helga til å kome på Kulturhelga Havglimt 20.-22. april. Vi gler oss difor til å sjå deg søndag 22. frå 15.30, når lokale krefter igjen prøver å lage mat frå alle dei landa vi kjem frå!
¡Bailamos bachata!
Fredag 20. april frå 21:30.
Bachata er en artig og emosjonell partnerdans, like godt eigna for gitaristar og kajakpadlarar som for Shakira-fans, folk som har to venstreføter eller berre er leie av vêret, og ikkje minst for alle som alltid har hatt lyst å lære å danse, men ikkje har hatt nokon stad å byrje.
Bachata stammar opphaveleg frå Den dominikanske republikk, men i dag blir den svært mykje dansa i Europa saman med salsa og andre latin-dansar.
Under kulturhelga vil grunntrinna bli demonstrert av Inga Mölder som bur på Rangøya og har drive med latin selskapsdans i 6 år.
Alle er velkomne, men på golvet er det plass til 15 par. Vi vil difor be om at interesserte melder seg på innan torsdag 19. april. Vi anbefaler å melde seg på saman med ein partnar – men har du ikkje det, kan du kontakte Inga, som skal prøve å kople dei interesserte saman slik at det ikkje blir ei hindring.
Påmelding til inga.m2012@gmail.com eller telefon 40142188.
Litteraturprogram med gjester
Eg vart fødd ved havet. Mi mor fødde meg i dei store fiskerias tid, båtane / kom inn med lanterner gyngande i moreld om nettene, bresteferdige av fisk / kom dei inn, som dunkande hjarto inn i mine draumar.
Orda er frå diktsamlinga Missa frå 1998 av Knut Ødegard — ein av dei verkeleg ruvande skikkelsane i kulturlivet i Møre og Romsdal. Sidan debuten i 1967 har han vore ein produktiv forfattar og lyrikar. I Romsdals Budstikkes lesarkrins er han også kjent som Liabonden, med æresmedlemsskap i Bondelaget.
Ødegård er grunnleggjaren av Bjørnson-festivalen, har skrive kongediktet ved kongebjørka og grunnlagt Fredslunden i Molde. Mykje av sitt liv har han budd på Island, dei siste åra har han gitt edda-diktinga ny norsk språkdrakt i fire band. Og i 2017 vart han nominert til brageprisen for si nye diktsamling, Tida er inne.
Og den 21. april kjem han til Kulturhelga Havglimt på Rangøya. Og det gjer du òg! Så sett av kvelden. Litteraturprogrammet byrjar laurdag kl 19:30 på Løa.
Arvo Pärt. Sjølv om eg mistar alt
Laurdag 21. april kl 22:00
(Engelsk teksting)
Arvo Pärt er verdas mest framførte komponist. Om du ikkje har høyrt om han, har du svært truleg likevel høyrt han – om ikkje anna, så i ein film. Lista over filmar som har brukt hans musikk er ganske overveldande.
Pärt vart fødd i 1935 i Paide i Estland. Som komponist har han utvikla ein eigen komposisjonsteknikk, kjent som tintinnabuli. Eit av hans mest kjende verk og ein fin plass å byrje lyttinga er Spiegel im Spiegel.
Arvo Pärt er kjent for å vere sparsam med intervjua, men i filmen «Sjølv om eg mistar alt» opnar han seg for oss. Og denne heilt spesielle portrettfilmen får du sjå under Kulturhelga Havglimt.
Velkommen til nattkino laurdag 21. april!